Histoire Passion - Saintonge Aunis Angoumois

Accueil > Grands thèmes d’histoire locale > Métiers d’autrefois > Menuisiers > 1512 - Angoulême - Statuts et privilèges des maîtres menuisiers

1512 - Angoulême - Statuts et privilèges des maîtres menuisiers

mardi 1er mai 2007, par Pierre, 942 visites.

Source : Archives communales d’Angoulême. Reg. coté A, f° 324-327, BB. 1. - Cité dans Bulletins et Mémoires de la Société Archéologique et Historique de Charente - Année 1894

STATUTZ ET PRIVILLÈGES DES MENUZIERS D’ANGOULÊME (1512).

A très hault et très excellant prince Monseigneur duc de Valloix et conte d’Angoulesme.
Supplient très humblement voz très humbles subiectz et obaissans : Jehan Aulthier, Foucault Villate, Clément Lecocq, Jehan Bernard, Perot Bousthemousche, Marcial Bousthemousche, Jehan Bousthemousche, Jehan Debrandes, Martin Tenyere, Jehan De Saliz, Guilhaume Jacob, Mathurin Robbyn, André David, Jehan Renuduet (?) et Cristofle Peuples, maistres menuziers demeurans en vostre ville d’Angoulesme, il vous plaise, de vostre bénigne grâce, leur accorder et octroyer et à leurs successeurs quy seront maistres menuziers demeurans en vostre dicte ville, par manière de statutz et privilleges, les articles cy dessoubz mounomés, et les dictz supplians et leurs successeurs prieront Dieu pour vous et vos très haultes et très excellantes prospéritez à jamays.

- PREMIEREMENT que les dictz supplians puissent fonder et entretenir une confrayrye et faire dire et cellebrer en l’église sainct André, en vostre dicte ville d’Angoulesme, chascun jour de dymenche perpétuellement leur messe et autres services et prières en l’honneur et rendance de Madame saincte Adne ; Et pour iceulx confrayrie, messes et services entretenir, les dictz supplians et leurs dictz successeurs maistres menuziers demeurans en vostre ville puissent prandre, lever et amasser les deniers sur ceulx et en la manière que les articles cy dessoubz délibérés sera spécifflé et délibéré.

- 2e - ITEM pour le bien publicq, utillité et entreténement dudict mestier et q’uen icelluy mestier et ouvrages d’icelluy aulcuns deffaulx et domages ny soyent comis, nul ne pourra tenir ouvroer ne faire fait de maistre dudict mestier de menuzier, en la dicte ville et faulxbourgz d’icelle, qu’il ne soit ouvrier veu et asperimenté par les maistres jurez d’icelluy mestier de la dicte ville d’Angoulesme.
Et par eulx rapporté et tesmoigné sous serment au mayre de vostre dicte ville, et ce à peyne de soixante solz tournoys d’amande aplicquée moytié audict mayre, l’autre moytié à la boyte des dictz maistres jurez, pour l’entretenement de la dicte confrayrye, messe et prières susdictz.

- 3e - ITEM celluy qui vouldra estre receu à la maitrise et franchize dudict mestier sera tenu, palablement, faire en ladicte ville ung chef d’euvre dudict mestier, tel qu’il luysera ordonné par lesdictz maistres jurez. Porveu que la dicte pièce de chef d’euvre nexédra point la some de neuf solz tournoys qu’il sera tenu fayre pour la compaygnie des dictz maistres jurez, en l’oustel et ouvrouer de l’un des dictz maistres jurez, et poyer les droiz et debvoirs cy dessoubz delliberez.

- 4e - ITEM et ne pourra le dict ouvrier chevilher ledict chef d’euvre, qui luy sera ordonné par les dictz maistres jurez, sans leur compaygnie et que iceulx jurez nayent veu et visité la dicte pièce de chef d’euvre, laquelle pièce de chef d’euvre chevilhée, parfaicte, demeurra une journée entière en l’ouvrouer dudict maistre onquel le dict chef d’euvre aura esté fait pour icelle estre veuhe par ceulx du dict mestier.

- 5e - ITEM que, pour le droit de la réception, chascun qui se vouldra faire passer et recepvoir maistre dudict mestier veu et esperimenté par les dictz maistres, poyera aux maire et conseilh de ladicte ville VII solz tournoys, et à chascun des dictz maistres jurez delà dicte ville cinq solz tournoys et cinq solz tournoys à la dicte boyte delà dicte confrayrie, et donner à disner bien et convenablement aux dictz maistres jurez, porvu que le dict disner nexcedde la somme de quarante solz tournoys. Lesquelles chouses seront poyeez avant qu’il soit reseu à la dicte maistrize ne qu’il puisse lever ne tenir ouvrouer en la dicte ville.

- 6e - ITEM seront tenuz tous filz de maistres jurez faire ung chef d’euvre avant que estre receuz maistres d’icelluy mestier, mais ne seront tenuz payer aulcuns fraiz ne despans fors seullement cinq solz tournoys à vostre dict séneschal ou son dict lieutenant, et cinq solz à la dicte boyte et le disner aux dictz maistres jurez le jour de sa réception.

- 7e - ITEM et sera enjoinct à tous les dictz maistres et ouvriers dudict mestier de faire bons et loyaulx ouvrages, sans y commestre aulcune faulte ou abuz, sur poyne de forfaicture de leur dict ouvrage et de cinq solz tournoys qui seront mys en la dicte boyte et amployez auxdictz confrayrie, messe et services et ce par chascune foiz qu’ilz en seront recquis ou amander ladicte besoigne ou ouvrage au rapport des dictz maistres jurez.

- 8e - ITEM que nulz du dict mestier ne facent huyz enchasselhez, chassiz à voyrre, porte-fenestre de chaisne ou d’aultre boys où il y ayt au bout soit des paneaulx ou des mambrures, mesme es lieux où il peut porter prudice et y ayet cause raisonnable, et ce sur poyne de dix solz tournoys chascun aplicquez moytié à la dicte boyte et l’autre moytié à la dicte ville.

- 9e - ITEM et pour entretenir la dicte confrayrie, messes, services et aultres charges, est dict et ordonné que chascun maistre dudict mestier de menuzier tenant ouvroir ouvert en la dicte ville et faulxbourgz, aussi chascun compaignon coureur ou aultre compaignon qui besoignera dudict mestier, en la dicte ville et faulxbourgz sera tenu poyer par chascun jour de lundy, savoir : chascun maistre et compaignon coureur troys deniers tournoys, et chascun compaignon besoignant en ouvroir du dict mestier deux deniers tournoys.
Et si aulcun des dictz compaignons ou coureurs besoignans chez les dictz maistres s’en voulloit aller et il deust aulcuns restez en arrérages des dictz troys ou deux deniers, son dict maistre, en le poyant, pourra et sera teneu retenir dudict service ce que le dict varlet ou compaignon doyvra, pour estre mys et employé à la dicte boyte et auxdictz messe et services sus dictz.

- 10e - ITEM et pour garder et observer ces présantes ordonnances, les dictz maistres se pourront assembler ensemble toutes fois et quantes et en quelque lieu que bon leur semblera, en la dicte ville, et seront tenuz par chascun an, le jour et feste saincte Adne, ou le landemain, s’assembler et eslire et instituer entre eulx deux jurez dudict mestier, lesqueulx auront la garde de la dicte boyte, et deux autres des dictz maistres en auront et garderont les clefz. Et ceulx d’eux qui auront et garderont la dicte boyte seront tenuz, chasque lundy durant la dicte année, amasser les dictz deniers et aultre debvoir et iceulx mestre en ladicte boyte et faire dire et cellebrer la dicte messe chascun dimenche et entretenir la dicte confrairie et lumynayre d’icelle, le tout aux despans et des deniers de la dicte boyte. Et à la fin de leur année, seront tenuz randre compte aux autres deux et seront esleuz et commis à icelle boyte garder pour l’année lors advenir, aussi en présance des aultres maistres ou de iceulx d’eulx qui y veuld estre et vacquer le tout pour evister les abuz qui se pourroyent ensuyvre.

- 11e - ITEM que les dictz deux jurez qui ainssin seront esleuz et commis pour chascun an à la garde de la dicte boyte seront tenuz aller souvant en visitation des chouses dudict mestier, par la dicte ville et faulxbourgz, pour obvyer aux faultes et abuz qui se pourroyent comestre au dict mestier, et de ce qu’ilz trouveront est mal fait et en esté mesprins en feront leur rapport au mayre delà dicte ville, qui a la vanche (?) et pollice en tielle chouse, le tout sans fraulde et pour le faire régir comme dessus.

- 12e - ITEM aussi les deux jurez qui ainssin auront la garde de la dicte boyte, en amassent les dictz deniers et debvoir dessus dellibérés, pourront eulx mesmes gaiger les dictz maistres et variez et compaignons et les contraindre poyer les dictz debvoirs tielz que dessus.

- 13e - ITEM. Toux ceulx du dict mestier en la dicte ville et faulxbourgz prendront, si bon leur semble ou par devers eux la coppie de ces présantes ordonnances et statutz, affin qu’ilz n’en puissent prétendre cause d’ignorance. Et en passant et recepvant les ditz maistres, ces dictes présantes ordonnances leur seront leuhes et publyeez.

Un message, un commentaire ?

modération a priori

Ce forum est modéré a priori : votre contribution n’apparaîtra qu’après avoir été validée par un administrateur du site.

Qui êtes-vous ?
Se connecter
Votre message

Pour créer des paragraphes, laissez simplement des lignes vides.

Lien hypertexte

(Si votre message se réfère à un article publié sur le Web, ou à une page fournissant plus d’informations, vous pouvez indiquer ci-après le titre de la page et son adresse.)

Ajouter un document

Rechercher dans le site

Un conseil : Pour obtenir le meilleur résultat, mettez le mot ou les mots entre guillemets [exemple : "mot"]. Cette méthode vaut également pour tous les moteurs de recherche sur internet.