Ce sont les ordonnances et institutions de l’arpent du roy, notre sire, au pays et conté de Xainctonge, tant de ça que de là la rivière de Charante, ville et gouvernement de La Rochelle ;

et doibt avoir la chaisne de l’arpenteur dix sept piez et demye marchans, qui content cinq pas de trois piedz et demy chacun, qui est cinq aulnes de Paris.

 XAINCTES

Premièrement en la chastellenie de Xainctes, chascun quartier ou harpan doibt contenir quatre vingtz cinq pas en carré, et pareillement ès dépendences d’icelle, qui est deux cens quatre vingtz dix sept pieds et demy.

Item chascun quartier ou harpan du siége et ressort de l’église de Xainctes doibt estre de soixante douze pas en carré, et pareillement ès dependences d’icelle, qui est pour quartier deux cens cinquante deux piedz qui vallent deux journaux dix carreaux.

 THALEMONT

Item en la chastellanie de Thalemon-sur-Gironde, chascun quartier ou harpan doibt estre pareilh à celuy de Xainctes.

 MARENNES, OLLERON et ARVERT

Item un chascun quartier ou harpan ès bailliages de Marennes et seigneurie d’Olleron et Arvert doibt estre de quatre vingtz cinq pas en carré.

 RICHEMONT

Item en la chastellanie de Richemont et dépendences d’icelle, chascun quartier ou harpan est de quatre vingtz cinq pas en carré, qui est deux cens quatre vingtz dix sept pieds et demy.

 ROYAN

Item en la chastellanie de Royan, chascun quartier ou harpan est de quatre vingt cinq pas en carré comme à Richemont.

 PONS, PLASSAC, LE VIROUL, COSNAC, MONTANDRE, BARBEZIEUX, CHALAYS, COYRON, BROUSSAC, ARCHIAC, JONZAC, SAINCT-MAGRIN, VOUGEZAC (?), MONTBOUYER, OZILLAC, FONTAINES, MONTLIEU, MONTIGNAC-CHARENTE, PONT-LABÉ, MORTAGNE, MASTAZ et TAILLEBOURG

Es chastellanies susdictes, chascun quartier ou harpan doibt estre de quatre vingtz dix pas en carré, et semblablement ès dependences d’icelles, qui est trois cens quinze pieds en carré, qui vallent trois journaux un quart, et chascun pas vault trois pieds et demy marchandz, et chascun quartier vault trois cens vingt quatre carreaux.

 PARCOUL, CHAMPAGNE, NANCRAS et SAULJON

Es chastellanies et bailliages susdictes, chascun quartier et harpan doibt estre de quatre vingtz cinq pas en carré, et pareillement ès dépendences d’icelles, qui est deux cens quatre vingtz dix sept pieds et demy en carré, qui est trois journeaux moins dix carreaux.

 SAINCT-JEHAN-D’ANGÉLY

Chascun quartier de l’abbaye Sainct-Jehan-d’Angély doibt contenir soixante pas en carré, et doibt contenir ledict harpan deux cens dix pas en carré.

 ROCHEFORT

En la chastellanie de Rochefort et dependances d’icelle, chascun quartier ou harpan doibt contenir quatre vingtz dix pas en carré, qui vallent trois cens quinze piedz.

 LE GRAND FIEF D’AULNIS, CHASTELAILLON

Le quartier ou harpan ès grandz fiefz d’Aulnis et Chastelaillon et dépendences d’iceluy doibt contenir cent dix carreaux.

 AULNAYS et SOUBIZE

Es contez et chastellanies susdictes, chascun quartier ou harpan doibt contenir soixante quinze pas en carré, et pareillement ès dependences d’icelles, qui vault ledict quartier deux cens soixante deux piedz et demy en carré, et chascun vault trois piedz et demy marchandz qui est quinze longueurs de chaisne.

 BENON, FONTENAY, TAUNAY-BOUTONNE, THAUNAY-CHARANTE

Es contés et chastellanie susdictes et dépendences d’icelles, chascun quartier ou harpan doibt contenir soixante et douze pas en carrré, qui est deux cens cinquante deux pas en carré qui vallent deux cens carreaux [papier rongé] journaux. Item, èsdicts, pays et conté de Xainctonge, ville et gouvernement de La Rochelle et dépendences d’icelles, chascun journaux de terre contient cinquante pas en carré, qui vallent dix chaisnes en carré, et les dix chaisnes vallent cent carreaux, et chacun carreaux vault dix sept piedz, et chascun jour[naux] huict vingts quinze piedz en carré.

 LES DROICTZ ET DEVOIRS DE L’HARPENTEUR

L’harpanteur pour l’harpant et mesure d’un chascun quartier et appartient pour son droict et sallaire sept sols six deniers parisis forte monnoye.

Item, audict harpanteur apartient, de son droict, quand il harpante, tout le bois qui empesche l’alle de la chaisne.